2014-09-21

ممكن تعديني يا عزيز؟

ازيك يا عزيز؟
أنا مش كويسة. خرجت من عند الدكتور خفيفة، بعدي الشارع وبفكر إن رجلي مش بتوجعني، بتترعش بس مش بتوجعني، بفكر إني في أول فرصة هكتب: حتی الدكتور عرف القصة من غير ما أحكي، وعلی طريقة تحصيل الحاصل:
احنا هنعمل التحاليل والأشعة دي تاني، ولو طلعت سليمة، أنصحك تشوفي طبيب نفسي.
والله قلتله ع اللي بحسه يا عزيز، علی قد ما افتكرت، وحاولت أستبعد التهيؤات، وهو يكررها: ممكن تكون نفسية.

كنت بكرر كلامه وأنا بعدي الشارع بخفة، ولقيت نفسي في الأرض. وقعت يا عزيز. هزمني تقلي تاني. كنت لوحدي، وكانت الدنيا ضلمة، والعربيات زي الأشباح، وأنا بنادي اللي مبتسمعش.

محدش من اللي حاولوا يساعدوني كان فاهم أنا بعيط ليه، بس كانوا طيبين يا عزيز، والبنت اللي عدتني بقية الشارع سابتني أمسك إيدها لأني كنت خايفة أقع تاني.

من المفارقات يا عزيز إنه قبلها بكام ساعة لما كنت في طريقي للمستشفی، كنت بفكر قد إيه هيكون صعب إني أقطع المحور لوحدي، كنت بفكر أروح لأول حد يقابلني:
من فضلك، ممكن تعديني؟
من غير ما الحد يفكر إني عايزة أكتر من تعدية.

20 سبتمبر 2014

هناك 4 تعليقات:

  1. سايبالك هنا (حضن)
    كل حاجة هتكون كويسة ..مش سؤال و لا اجابة
    بس جملة مفتوحة على أمل .

    ردحذف
  2. امبارح بليل حلمت بيك انك عندي في البيت وان ملحقتش اعمل غدا فعملت سندوتشات ،كان عندي ارق جامد كل ما انام واصحى احس الحلم مخلصش واني لسه شايفاك.
    انا عارفة ان كل الكلام في وقت ما مش بيعمل حاجة بيفضل الوجع زي ماهو مش بيقل
    اعتقد ان دفا الصحبة والمشاعر الصادقة ممكن تهون بس انت سيبي نفسك تستمتع بوجود الاخرين الحقيقين في حياتك صدقي دورهم في تخفيف المك
    ربنا يكتبلك الخير

    ردحذف
  3. اي كلام كتعليق هيبقى اي كلام ...
    ليه انتي بعيدة كده؟
    وليه مش عارفة اجي اخد ايدك ونعدي بعض المحاور المؤذية؟

    ردحذف