2018-09-02

ليه؟

أصل يعني، إيه المجاز اللي بتدوري عليه؟ ليه المجاز وانتي ممكن تقولي الحقيقة العارية؟ تقصدي إنك مش قادرة تقولي الحقيقة؟ العارية؟ عارفة الغلب اللي شامية كانت حاسة بيه وهم الناس كلهم شايفينها ساقطة، وهي مش ساقطة غير في خيبتها؟ شوفتي كانت كارهة جسمها قد إيه، وقد إيه نوّرت وصغرت عشرين سنة لما حبيبها لمسها؟ لما اتخلى عن قسوته أخيرا وعيط في حضنها؟
مش عارفة ليه كل ما بفتكر إن فيه أمل أبقى كويسة، بتحصل حاجة، وبلاقيني بعيط. أخدت الطريق للبيت امبارح، وكنت لي كتير مش بمشي للبيت، أخدته كله عياط، بكلم نفسي: ليه ما حضنتنيش؟ ليه؟ كنت حاسة إني وحيدة، متسابة لوحدي، ماليش مكان، ومأذية. مش عدل إني يبقى مطلوب مني أعيش وأدي وأشتغل وأنا كده، وأنا ميتة كده.

هناك تعليق واحد:

  1. انا سمحت لنفسى انى اغطس جوه كلامك هنا فى المدونة, و اكتشفك حاجات جميلة كتير و اكتشفت كمان انى مش لوحدى , انتى مش لوحدك يا لبنى , فى مره وانا قاعد اختى قالتلى احمد انا محتاجه حضن ممكن تحضنى ؟ انا مافهمتش ساعتها بس انا حضنتها و خلاص , بس النهارده انا فهمت , لاحظت ان عندك اصحاب كتير منهم مثلا طارق و حاتم و نهى و رضوى و أسامة وميرا وإسراء ورزان ومصطفى , انتى عندك اصحاب كتير يا لبنى ده شئ كويس جدا فى ناس ممكن مايبقاش عندهاغير 2 صحاب او اقل , اجمدى يا لبنى الحياة حلوة ومليانة مفاجات

    ردحذف