2018-09-16

Obsession and other illnesses

يا جميل
يعني انت لما تقول لي بكل الجمال اللي في الدنيا: والنبي يا جميل حوش عني هواك، تفتكر أنا كده هفكر مجرد تفكير في إني أحوش هوايا؟ طب والنبي يا جميل حبّني.

عنصرية
اتضح إن جوايا عنصري صغير يريد الفتك بالمخالف المستفز اللي معتقدة إن جواه عنصري صغير يريد الفتك بالمخالف المستفز اللي معتقد إنه ...

اكره نفسك
هنخلص امتى من هراء "حب نفسك" وما تستناش حب حد؟ اشغل فراغك بحاجة مش بحد؟ استغنى؟ مالكم؟ ها؟ مالكم؟ إيه علاقة كل ده باحتياج البني آدم للصحبة ولحد يشوفه ويهتم بيه ويحضنه، يشاركه أكله وخوفه وحزنه وضحكه وسريره؟ إيه العلاقة يا عديمي الإحساس ومدعي العقل والحكمة؟ يا متخلفين!

حرية
لقد خلقنا الله أحرارًا بس احنا اللي غاويين عبودية.

س ص ع
القصة المتداولة بتقول: س بيحب ص و ص بيحب ع و ع مش بيحب حد و س ما حدش بيحبه و ص و ع مش واخدين من الحب اللي بيتحبوه حاجة، وأساسا س و ص و ع وكله رايح.

أوف!
بفكر أتعاقد مع شيطانين طيبين، واحد يزقني لما أبقى محتاجة أتزق وآخد آكشن، عشان كفاية استهبال كده، وواحد يكتفني من إيديّ ورجليّ في لحظات التهور والاندفاع الأعمى، عشان ما أوديش نفسي والآخرين في داهية.

02:34
إيثار بطلت تحضنني لما بعيط، يمكن عشان بعيط كل يوم حتى في أيامي اللطيفة؟ امبارح نمت أكتر من 24 ساعة مع فواصل قصيرة، ولما صحيت الصبح فضلت أعيط نص ساعة على الأقل، وكتبت للتيريكس أقول له إني آسفة، ولما إيثار قلقت على صوت عياطي، قلت لها أنا آسفة، غمضت كأنها ما صحيتش، وبعد شوية فتّحت تاني وقالت لي إنها آسفة، بينما كنت بلبس في آخر عشر دقايق قبل ما أنزل من البيت. أنا ليّ يومين تلاتة باين بنزل بدري وبلحق الباص، وده طبعا مش معناه إني بشتغل زي الناس. أنا نفسي أفضل نايمة وما اصحاش، لكن دراعاتي تطول وتروح تطبطب على التيريكس العزيز وتقول له إن فيه ناس في العالم ده بتحبه.

ليست هناك تعليقات:

إرسال تعليق